Support
منتدى فتش منتدى السودان مُعظم الأراضي السكنية بالخرطوم أسعارها مستقرة
12345678910

مُعظم الأراضي السكنية بالخرطوم أسعارها مستقرة

كشفت متابعات (الرأي العام) عن استقرار فى أسعار معظم الأراضي السكنية والعقارات التجارية بولاية الخرطوم ، بجانب ضعف الطلب عليها بالرغم من قلة العرض، وعزا تجار وسماسرة الأراضي والعقارات ذلك إلى شح السيولة اللازمة وحالة الركود والكساد التى أصابت الحركة التجارية والأسواق بصورة عامة وامتدت لفترات اطول فى تاريخ السوق السوداني، بينما ازداد الطلب على الأراضي بالوادي الأخضر حيث
# ارتفعت قطعة الأرض الدرجة الثالثة إلى (7.5) آلاف جنيه، والثانية (12) الف جنيه ، والاولى (17) الف جنيه.
من جهة ثانية:
# بلغت قطعة الارض بمنطقة السلمة الخيرية (55) الف جنيه بمساحة (276) مترا مربعا، واعتبرها التجار المنطقة الوحيدة التى فى متناول اليد بضاحية الخرطوم، وقال حمزة الحسن (تاجر أراضي ) انه على الرغم من اسعارها المناسبة، وشهادات البحث الخاصة بها، الا ان السكن العشوائي ما زال يسيطر عليها.
وأوضح حمزة فى حديثه لـ(الرأي العام) ان المنطقة تم تخطيطها قبل إخلائها من السكن العشوائي، وتم تعويض بعض القاطنين عشوائيا فى مدينة الرشيد وبالحارات البعيدة غرب ام درمان، ولكن معظمهم لم يبرح المنطقة ، بينما ظل البعض فى انتظار التعويض، وتابع : (على الرغم من الإقبال الكبير على أراضي المنطقة، الا ان السكن العشوائي يقف حجر عثرة أمام الكثيرين من المالكين والراغبين فى الشراء).
واشارالحسن الى ان اسعار المناطق المجاورة لمنطقة سوبا الخيرية، وقال:
# بلغت القطعة بمنطقة عد حسين (80) الف جنيه
# والسلمة (130) الف جنيه
# والازهرى (155) الف جنيه للدرجة الثالثة، و(220) الف جنيه للثانية ، والاولى (270-300) الف جنيه
واضاف الحسن:
# بلغت القطعة الكبيرة (700) متر مربع بضاحية كافوري نحو (450) ألف جنيه، ومساحة (500) متر مربع بلغت (350) الف جنيه
# وبلغت قطعة الارض بمنطقة الفيحاء شرق النيل (200) ألف جنيه
# وبحي الوالي مربع (3) بلغت القطعة (250) ألف جنيه
# وتراوحت أسعار المنازل بمنطقة الرياض بين واحد مليون جنيه الى (1,5) مليون جنيه
# وبالمنشية (مليون ) جنيه الى (1,6) مليون جنيه حسب الموقع والمواصفات
# بينما بلغ سعر المنزل بمنطقة البراري (300-350) ألف جنيه
# وبامتداد ناصر (400-500) الف جنيه، باعتبارها منازل قديمة ومتهالكة حيث يتم تقييم المنزل بقيمة قطعة الارض وموقعها.

 

نقلاً عن صحيفة الرأي العام، مع بعض التنظيم

التعليقات
مشكورين كتير وياريت لو تم تحديث الاسعار + انسب منطقة عشان الواحد يشترى قطعه ويبنى طوالى عشان يسكن وين؟ يعنى لو الواحد عاوز يبنى دورين يسكن ويأجر الباقى وخاتى ميزانيى 250 لقطعه الارض بتنصحو بياتو منطقه

الازهري   افضل   مع  ميزانيتك

شكرا ياميدو انا بفضل شرق النيل على الازهرى . ممكن تنصح بمربعات معينة

اعتقد افضل مكان بشرق النيل حي النصر مربع 1 واقل قطعة في هذا المربع 400 مليون

ممكن تلقي قطعه في كافوري ب250 لكن المساحه اقل بس الميزه انو ممكن تاجر ايجار كويس بعد البنيان

السلام عليكم ممكن تنصحونا بالمربعات الكويسة فى كافورى والمربعات السيئة وايش عيوبها

ممكن تنصحونا بالمربعات الكويسة في الأندلس وأسعارها على الإيميل   amhameed@sbcglobal.net
انتو بتحلمو حلم دلوقتي 250 مابتجيب ليكم قطعة الا في الضواحي البعيدة
 يا ابو دوش اطنك سمسار......................اسعار الاراضى ستتهاوى وتنهار...................
سلام يا شباب افيدونا عن أسعار الأراضي مع العام الجديد 2013.

ياحليل اسعار زمان اتخيل هسي الاسعار بقت كيف  سعر الارض في الوقت داك يساوي سعر خروف الان
حسين 
اريد أن اعرف سعر الفدان فى جنوب الجزيره و تحديدا مربع مزيقيلا اذ سمعت بانها تقع فى منطقة اسثمار خليجى وهل هذا صحيح ، ولكم شكرى
اسأل عن قطعة عادية باركويت اي مربع
غتدي في حدود700 ماذا تنصحوني ان اشتري
اشتري في البراري اة اركويت المعمورة او شرق النيل الفيحاء
ام محمد كدى اركبى عربية واتجهى الى مخطط سباء وهو يقع جنوب مستشفى سوبا ويبعد حوالى ستة دقائق بالعربية من اركويت
وهو حسب علمى مخطط جاهز من كل الخدمات وكل البيوت تفتح على شوارع مسفلتة وجميع الفلل راقية و هو عامر بالسكان
وهو المخطط الوحيد جنوب الخرطوم العامر بالسكان .. تسمعى الدبلوماسى والرضوان والريان ...الخ كلها صقيعة ساى
ال 700 مليون بتاعتك دى بتجيب ليك قطعتين كل واحدة 300 متر ..اشترى وانتظرى سنة وبعدين بيعى واحدة وابنى الثانية.

مجرد راى
الحي الدبلوماسي ماشاء الله ماشي كويس خالص. الناس بدت تبني فيهو. اول حاجة سعرو معقول حوالي 300 مليون و الباقي بيبني ليكي بنا محترم. انا دا رائي لانو مافي داعي الزول يرمي قروشو كلها في قطعة ارض.
700 لو حاولت تبني اسال مجرب البناء يكملها ليك
اذا عايز تسكن ومستعجل اشتري ليك بيت جاهز شرط تفحص عن طريق شخص مختص
غير كده اشتري ليك قطعتين يكونن في منطقتين مختلفتين شرط يكون في خدمات لان في السودان الخدمات تصل بعد سنيين 
وحده في حدود 300 والتانية في حدود 400 وانتظر فترة تكون وضحت ليك الامور
شركة سوقطرة عرضت مخطط جديد في جبرة  وطبعا جبرة لا تحتاج الي تعريف المخطط اسمو الاقصى اقل قطعه  فيهو 330ألف ريال  هي غالية ولكن في رأي الشخصي استثمارية في غاية الروعه
يعنى بالنسبه لام محمد ممكن ال700  اجيب ليكي قطعه مميزة بارتياح...
جبره ما حتت سكن. زحمه شدييييييد. المستقبل بقي سوبا و مخططات جنوب سوبا
ليس من الصواب تضع 700 الف في قطعه 300 ومخطط جديد محتاج زمن غير كده اكيد المشترين مغتربيين او بتاعين غسيل اموال لان 330 الف ريال مبلغ كبير يعني مافي عمار قريب

مخططات جنوب الخرطوم ( الدبلوماسي او سبا او الرضوان او الريان الخ ....) كلها اراضي سهلا ساكت اذا الواحد داير يستثمر مش بطال لان اسعارها مقبوله 700 دي تجيب قطعتين ابو 500 متر مميزات
rahme تحياتي
ده مخطط سبا    http://wikimapia.org/#lat=15.501879&lon=32.6341797&z=17&l=0&m=b

وهو مسكون وفيهو جمعيع الخدمات..
عندي فيهو قطعة 400 متر ولسة راسى ضارب ابنيها.. ولأ ابيع واكمل عليها واشترى بيت جاهز واريح نفسى من مشاكل البناء خاصة انا مغترب
اخي بروكسي البناء متعب ومكلف جدا ويرفع الضغط وبالذات انت بعيد بس في النهاية تضمن ليك بيت علي مزاجك وتكون فاهم بيتك طوبه طوبه
لكن ياخي لو داير تبني نصحية اقيف علي شغلك بنفسك حتي لو كل اجازه تشتغل حبه والله الشغل الشركات او توكل اخ كله مايفيد (( ابسط شئ الاسمنت داير رش مويه + المواد تقدر تجيبا بسعر ارخص تقدر تفاصل فيها + العامل يرفع السعر في اي عمل لو انت ماموجود يقول ليك ده سعر السوق لان كل واحد ليه سعر براه يتكلم من راسه بلد سايبه  الخ ...)

حكاية داير تشتري جاهز اكيد مابريحك

يفضل كل واحد داير يبني يثقف نفسه في طريقة البناء عشان السودانيين تنظيرهم كتير بدون تنفيذ والواحد مايبقي ملطشه عندهم اقل شئ يكون عارف داير يعمل شنو في بعض المواقع في النت مفيده تساعدك من الاساس الي التشطيب  هذا والله اعلم

موقع سبا حسب جوجل ماشاء الله كويس انا كنت داير اشتري في جنوب الخرطوم لقيت الدبلوماسي والرضوان والتنعيم والعوده لسع بدري عليهم لكن المنطقه عامة مبشره بالذات لو بدء الكبري حق سوبا حتكون قلب الخرطوم
تعرف يا rahme لو مخطط تبني وتسكن الان او خلال الثلاثة او الخمسة سنين القادمة شوف ليك مخطط او منطقة مسكونة من الان.

المخططات الجديدة دي اصبحت خزنة كبيرة للتجار وبعض المغتربين .. صارو يختو قروشهم فى الاراضى بدل البنوك لانها بتزيد اكتر وكلما يحتاجو لقروش
يبيعو قطعة ولما تجيهم قروش يشترو عشره
المخططات دي بعضها اكمل عشرة سنوات ولغاية هسى صقيعة ساي


يا بروكسي انا ما بتفق معاك. لسبب بسيط انو الخرطوم بقي مافيها مكان فاضي و لو لقيت بتلقي بسعر فلكي. علي سبيل المثال الازهري. الحته دي في سنتين بس بقت ماشاء الله و امتدت لحدي ما حدتها العشش. المخططات دي كلها مميزة و فيها خدمات (مخططات جنوب الخرطوم) بس الناس بتقول ليك صقيعة لكن لو واحد بدا يبني الناس كلها بتتشجع.
انا دايرك تمشي تشوف بيعينك و لمن قلت ليك الدبلوماس لانوانا مشيت شوفتو. فيهوا 4 فلل مشطبة احسن تشطيب و مسكونة. و معظم باقي الاراضي شغالين فيها. المخطط ممتاؤ و سعرو مغري شديد
تحياتي زولنا
الرد المكرر الفوق ده ما كتبتو انا الظاهر فى مشكله فى السيستم.

المهم .. مناطق الدرجة الثالثة دائما بتعمر بالسكان نسبة لحاجة الغلابة للسكن حتي لو ما فى خدمات.. مناطق الدرجة الاولى تعتمد فى بعض الاحيان على بعض الفدائيين
وفى كثير من الاحيان علي سكن شخصية مهمة او معلم بارز.. مثلأ الشيخ البرعى عليه رحمة الله فى المجاهدين وفى مخطط سباء قيام بعض الشخصيات الهامة بالبناء والسكن
والحراسة من شركة الهدف.
اتفق معاك بان الدبلوماسى مستقبلها افضل من البقية
شكرا اخواني على نصائحكم القيمة وسأستخير وافكر ماذا أفعل

أما بخصوص كلمة الصقيعة فاشترينا قطعي ارض بكافوري مربع 9 وكل من يعرفنا اتهمنا بالجنون واعتبره قرار غير صائب فانظروا الان كم يبلغ سعر القطعة
السلام عليكم
بسال عن اسعار ايجار الشقق فى كافورى بالاخص مربع 6ومربع5
سؤال للاخوه اصحاب الخبره باسعار الاراضى
عن اسعار الاراضى بمنطقة المطار الجديد غرب ام درمان للمساحات 500 متر و400 متر و300 متر بالتفصيل
وهل هذه المنطقه لها مسقبل علما بان السعر المعروض علينا 11 الف لقطعة مساحتها 400
12345678910


عفواً.. لا يمكنك المشاركة، يمكنك التسجيل في حال رغبتك بذلك.


جديد المنتدى

كلمات البحث

تابعنا

تابع اجدد الإعلانات