Support
منتدى فتش منتدى السودان مخطط المندرة جوار المطار الجديد الاستثمار الامثل
12

اول  حاجه واضح جدا عنوان البوست  بيتكلم عن الاستثمار   والاستثمار ممكن يكون غير  سكنى بالمعنى المفهوم عندنا يعنى ممكن يكون مستشفيات نوادي  مراكز تسويقيه  مولات  فنادق كفتريات مطاعم شقق مفروشه  استراحات  .....الخ
تاني  حاجه  المقارنه بين الدول الاوربيه  مع السودان   غير  عادله  وغير سليمه  وانت ذاتك  اعترفت بي بالكلام دا    وهو دا كلامك القلتو :
 <وطبعا ما تقولو لي الفنادق والفندقه لانو الكلام دهه عندنا ابدا ما تقوم لي قايمه ذي ما في مصر او سوريا او خلافه>
..................................................................................................................................................................

 هناك فوق  استشهدت  بالدول الاروبيه  لنفي  امكانية  الاستثمار جنب المطار  ولمن جات المقارنه في جوانب تانيه نطيت طوالي وقلت  ماتقوم لي قايمه   ..
دا طبعا يعتبر تناقض واضح في كلامك
 
كلنا عارفين بالرغم من عدم وجود الضروريات من الخدمات ناهيك عن الكماليات  وبالرغم من انعدام البنيه التحتيه  والوضع المتردي في كل حاجه بالرغم من كدا الاراضى طالعه في السماء  الدول الاوروبيه الانت بتستشهد بيها دي اراضيها ارخص  وانت سيد العارفين في المجال دا ... وقانون العرض والطلب ما شغال عندنا  عشان كدا اقول ليك نحن هنا في السودان نظرتنا بتختلف عن نظرة الشعوب التانيه يعنى بوكس موديل 1979 ولا 80  في السودان  ممكن ابدلو ب بوكس 2010  عادي  لكن الكلام دا ما بيحصل في أي دوله تانيه....
  اها نجيك في موضوع الازعاج والسكن وخالي جنب المطار  والعمارات واركويت  انا برضو قريبي ساكن اركويت لو كان الازعاج للدرجه  دي كان رحل زماااان  لكن خلينا من اركويت والعمارات  ...
 
يااخوانا الفنادق اكتر محلات يفترض ان تتوفر فيها الهدوء والسكينه والامان  وعدم الجلبه والضوضاء  يعنى الفندق لو فيهو ازعاج وضوضاء  واصوات تصك الاذان  والله مافى زول يعتبه او حتى يقرب جنبو  خاصة الناس البتنزل في الفنادق دي ناس منقنقين ورجال اعمال وكبار الشخصيات  وبالتالي لو كان اصوات الطائرات بتؤدى  لضوضاء كما تصفه انت  كانت الفنادق الجنب المطارات والداخل  المطارات  خسرت  وقفلت وشالو عفشم وفرتقو زماااااان..
اها نجي في المناطق السكنيه القريبه من المطارات 

الطائرة دى نازله في مطار هيثرو البريطانيه واضح جدا انو  الطائرة دي ماره بفوق منطقه سكنيه  مكتظه بالسكان  .......برضو تقول لي الدول الاروبيه!!!
عاطر التحايا ود ادريس
شوف يااخوي نحنا فهمنا خاطي او خلينا نقول  فهمنا للامور مبني علي فهم  طبقة معينة من الناس فقيرة او متوسطة ودي فيها السماسرة والاغلبية العظمي من الناس عشان كده الطبقة الغنية دخلت في الموجة لكن لو تحسن وتقاربة الطبقات بين الناس  الوضع يكون غير ولكن مافي شئ مقنع يخلي
1- بوكس 1980 يساوي 2010 لانه مرغوب عند الطبقة الضعيفة ومصدر دخل لكن لو مرت السنين العجاف (ازمة البلد والتدهور ) مايسوي شئ يعني مرحلة وتنقضي
2- السكن في الوسط منطقة الاسواق وترك المناطق الهادئة احسن سكن وقمة المتعة ورفاهية بسبب المواصلات تعبانة
3- سكن في اطراف المطارات وحولها حلم او اسنثمار  وصوت الطيارات موسيقا لاننا طرش وجارين في الحياة مابنسمع الا لمن نرتاح نحس بطنين
وبعدين لو فندق او لكونده جنب المطار تستخدم للحظات عابره واصلا ما المفروض فندق يكون جنب المطار الا يكون السودان دوله من كوكب اخر والمطارات بتكون بعيده من المناطق السكنية
4- وسكن جنب محل الريس ينوم (كافوري زراعية ) ده نعمة عشان يمكن الواحد بكره يكون وزير ولا شنو
5- وسكن تحت الكبار يظفر به كل زي حظ سعيد كل ما نشوف لينا اخبار في كبري جاي نجري ونرفع اسعار المناطق في شارع الجاي بيه الكبري عشان شنو ؟
المقصود القرب ام المواصلات انا غايتو ماشايف اي ميزه

صدقني دي كلها مفاهيم تتغير بين ليلة وضحاها لان السودان متغلب الارادة بكره كلمة من وزير يتغير كل شئ او الاقتصاد يتحسن الفي المنشية يفضل الوادي الاخضر يفتش للهدؤء والسكنية

ود ادريس اخوي مايكون حاضن ليك كم فدان هناك ههه يمكن كلامي خاطئ او صائب ؟
اخي الفاضل   
غايتو انا و اخوي رحمي دهه حانناديك ود ادريس عشان انا ما بفضل زكر الاسماء ثلاثي و رباعي في المنتديات لاسباب زكرتها آنفاً
تعرف صورتك الفوق دي ذكرتني بي حادثة صقوط الطائره اللايبيريه في اول التسعميات علي ما اعتقد في اركويت و اللتسببت في تحطيم منازل و وفاة اسره و ازكر انحنا اثناء تمرين كوره ( وهنا للاسف كان بالجد تمرين كوره) رأينا الطائره فوق رؤسنا فمن منطقة الصحافات تتهاوي
 و ربما يزكر البعض من الاخوه هنا هذه الحادثه البشعه
نسأل الله السلامه للجميع

المهم اول حاجه  ما فهمته ان المخطط هو في المقام الاول مخطط سكني
فلا اعتقد انو شهادات البحث المخطط تحمل عنوان بوستنا هذا و اللي بقول مخطط استثماري كما اسلفت    . . .  كويس
طيب برضو كلامك (" والاستثمار ممكن يكون غير  سكنى بالمعنى المفهوم عندنا يعنى ممكن يكون مستشفيات نوادي  مراكز تسويقيه  مولات  فنادق كفتريات مطاعم شقق مفروشه  استراحات  .....الخ)"

و في الحته دي خليني بس اعيد ليك كلام اخونا و دليلنا المهندس الاستشاري الفذ عصام في إجابته علي اختنا العزيزه sarona لهما الحيه

السلام عليكم sarona وعلي جميع رواد المنتدي
اما بالنسبة لسؤالك هل ممكن بناء دكاكين فى بالقطع السكنية 
يسمح بعمل دكان واحد بالقطعة بالضوابط التى تحددها السلطات المختصه بمساحة لا تزيد عن 25 م2


 يا اخوي  كفاك لحدي كده بس ما بقومو يقولو بايعه ذي كاريكا  كمان  ههههه

خالص تحياتي
اخي ود ادريس

انا في الحقيق ما إسترسله ليك في الاجابه علي مداخلاتك رداً علي مداخلتي الاولي  نظراً لما اورده الاخ العزيز رحمي من اجابه شافيه و وافيه تناول فيها  ما زكرته من مفاهيم و مقتنعات دفعتك لما كتبت
و رغم انني اري عدم تأني في قرائتك لما كتب في مداخلتي الاولي ألا انني اتمني منك هذه المره قراءة ما كتبه الاخ رحمي بكثير كثير كثير من التأني و الدقه
والله من وراء القصد و جذاك الله الف خير اخي رحمي

و لك مني جل الاحترام و الود علي المداخله نفع الله بها الاخوه و الاخوات
 
 تعرف يا رحمي غايتو زولك البأجر المضظلات الشمسيه دي ما في اي زول سبقو علي الستثمار دهه قبل كده
اهه شوف عليك الله الزول دهه سوقو حار كيفين
الناس خاله الفنادق هناك فاضيه وجايه بس عشان تنبطيح تحت الطيارات دي بس
ياخ دي عندها ضقل همبريب  سااااااااااااااااااااااااااااااي

يا اخوانا طبعا الصوره دي حقيقيه و الناس ديل ربنا ستر ولطف بيهم و شافهم من خطأ هذا الطيار الذي اٌصيب بإعيا اثنا عملية الهبوط بإحدي الجزر السياحيه
الاخوة رحمي وديك لاهاي نرفع لكم القبعات احتراما  يخوانا مروركم براه بالدنيا   

الرجل الفحل ود ادريس

ياخوي انتا رحمي دهه إشتغل ليك في الجرايد قدر ده خٌفته من المحاوره ولا شنو ولا كمان اقتنعته سريع
وان بقي كمان في عندك راي سديد (غير الرإستثمار الربح و الخساره في شراء و تخذين الاراضي دي) كدي تعال اتحفنا و نورنا ربما نكون علي خطأ علي حد قول اخونا رحمي

بس قبل ما تدخل الميدان تاني تعال بي النٌص و (أحشي) الفنيله عشان شايف الحكم اخونا الحوتي مدخل يدو في جيبو يفرز في الكروت من هسه  ههههه
 
والله مخطط المندره ده حسب ما شفتو في الويكي مابيا (صورة قوقل) ، هو بجوار جبل المندره ، جبل المندره ده عارفنو وين ، جمب القطينه ، يعني انت تكون في قلب ولاية النيل الأبيض،،
في إعتقادي الخاص ، ده شغل بتاع حراميه ، وسماسرة ما عندهم اي رحمه او قلب . همهم الأول والأخير ملء كروشم وجيوبم من مدخرات وعرق المواطن ، او المغترب البسيط ، باللعب على وتر حب التملك ، واللعب على مسمى المطار الجديد،،

لحدي اطراف الخرطوم معاكم ، لكن السرقه تصل تودو الناس القطينه وتقولو ليهم جوار المطار الجديد، هذا ما لا يرضاه منكم المواطن ، ولا يقبله العقل الثاقب.
اعرف واحد من اقربائي كان عمل شركة وهمية وكان لايملك ولا مليم وحالته حاله ولكن رصيدهه الوحيد كان من جماعة الترابي وكان طبعا حسب الماضي علاقته قوية جدا من ناس المؤتمر الوطني في القطينه هده الشركة الوهمية وقوعو ليها ( ليس وقع عليها) المساحة التي تقع جنوب المطار وهي تابعة لولاية النيل الابيض القطينة بحوالي  500الف جنيه فقط بالجديد والراجل ما معاه ولا مليم  قام باع هدا المساحة أالوهمية (هي علي الورق فقط وليس لها واقع علي الارض ) لاحد التجار الكبار (احد اولاد النفيدي الشباب علي  مااظن ) بمليون جنية بالجديد وصاحبنا طبعا سدد ال500 بتاعة الولاية واخد 500 ومازال ملاحق التاجر الكبير ان يعطيه زيادة وطبعا  بقي تعرفون هاؤلاء الكبار وزوعوا هده المساحة علي  الورق في شكل مخطط جميل وشوارع ونواصي واسواق (علي الورق فقط ) وطبعا ممكن يطلعوا ليك شهادة بعث من مكتب اراضي القطينه وتعرفون اللعب في المكاتب في الاقاليم والموظفين يعطوك شهادة ولكن لاوجود له بالواقع ولو داير اي واحد يتاكد  يمشي لمساح ويدهب يحدد ليه ارضه لوما ضاع هو والمساح في صحراء  لاحدود لها ابقي انا ما ابو احمد
( طبعا التاجر الكبير والسماسرة المعاه حيربحو المليارات من هدا المخطط علي حساب المغشوشين الغلابة

اللهم هل بلغت فاشهد

ياجماعة المندرة دي ( هويد  و صي ) ....
يعني أرض خلا ....
الداير يسوي ليهو غنيمات وبيت شعر وعنده تانكر موية بتنفع معاه .
+
خلاصة القول في مشاركة الأخ abuahmed1957  ( المشاركة رقم 43) ....
قربت اشتري فيها ... ربنا ستر
مممم
السلام عليكم طيب يا جماعه رأيكم شنو في مخطط الميرلاند اللذي يقع خلف منتجع دريم لاند ويبعد 2 كم من شارع مدني و20 كم من شارع ال60 ؟
Dear Engg. Nada and All
Salaam Alaikum.
I want to share with you so points for you to consider before buying any land
1 - Do not buy any land anywhere if you cannot see it yourself
2 - If you are outside Sudan, spend money on a ticket a go to Sudan to see the land.
3 - If you cannot afford a ticket, the minimum you should do is to ask a friend, or a relative to photograph of the area the area
4 - Find out, like you are do doing on this forum, about the area
5 - Find at least 2 two people who have bought before you and ask them as many questions as possible
6 - Avoid areas that do not have electricity and water, even if you intend to keep it for the future
7 - Cheaper is not always better
8 - Do not make a decision to buy land when you are desperate
9 - If a deal sounds to good to be true then more than likely there is a problem with the deal
10 - Do not believe everything the "Samasra" tell you, the majority of them have their interest at heart and not yours 
11- Base your decision on logic and not emotion 
12 - Addition points that I hope others would add to this list
best regards,
Cappi
كتب اجونا العزيز/ Cappi 

عزيزتي المهندسة.
ندى و جميع الاخوه

السلام عليكم .

أريد أن اشاركم   بنقاط  يعد النظرفيها في غاية الاهميه  قبل الشروع في  شراء أي أرض
1 - لا تشتري أي أرض في أي مكان إذا كنت لا تستطيع رؤية ذلك بنفسك
2 - إذا كنت خارج السودان،لا تستخسر إنفاق المال على تذكرة الذهاب الى السودان لرؤية الأرض.
3 - إذا كنت لا تستطيع شراء تذكرة ، كحد الأدنى ما يجب عليك فعله هو أن تطلب من صديق أو قريب   تصويرة المنطقة
4 - حاول معرفة معرفة المزيد   ، كما  تفعل الان  في هذا المنتدى، حول المنطقة
5 - البحث  اثنين على الأقل من الأشخاص الذين  اشترو في نفس المنطقه قبلك   واطلب منهم الاجابه علي كل تساؤلاتك عن المنطقه  بقدر الإمكان
6 - تجنب المناطق التي ليس لديها الكهرباء والماء ، حتى إذا كنت تنوي الاحتفاظ بها للمستقبل
7 - الرخيس بي رخسته  يضوقك . . .
8 - لا تجعل اليأس سبباً لقرار  شراء اراض و السلام
9 - إذا كان يبدو علي الصفقه انها  اقرب للحلم اكثر  من ان تكون  حقيقيه وواقع , صبح قطع شك   وجود مشكلة في  الصفقة
10 - لا تصدق ايي  " سِم ساري  " اقول ليك ،همو كلو بس اخدمك من قلبو
11 - أبني قرارك على المنطق و ليس العاطفة
12-نقطه إضافية,   آمل  الآخرين إضافة ما يرونه مناسب  إلى هذه القائمة
  

مع أطيب التحيات ،

Cappi
Deek lahay,
Thanks.
Cappi
نقاط اخونا كابي ال 12في غاية الاهمية وانا اعتبرها دستة وصايا
واضيف لها
13 - الابتعاد عن مناطق السيول وتجمعات المياة (رعب و بعوض وذباب وعفانه ) وانت طالع من بيتك وحلان وراجع وحلان وجزمتك في يدك
14- لو داير تسكن اهتم بجيران (الجار قبل الدار) لانه يخدمك في تربية الاولاد والراحة النفسية
15- اذا اشتريت ارض حاول خلي اجراءتك عند محامي ثقة من طرفك ليس من طرف السمسار او البايع ياما في تواكيل مزوره واراضي مبيوعه لاكتر من شخص
16- اذا كنت بعيد اعمل حجز للقطعة الزمن بقي صعب ولعب كتير
capi,ديك لاهاي ورحمي مشكورين علي المرور معلومات عامه بس مفيده وقيمه ودمتم.....
السلام عليكم
يا شباب  اخر  اخبار  مخطط  المندره  شنو ؟   هل  هو مخطط  حقيقى  ولا  وهمى    شغل  سماسرة  العنده  معلومات   حقيقيه   يمدنا  بيها   جزاكم  الله  خير
up
المندرة ده مخطط غير واضح المعالم واخاف انو يكون اكبر مقلب واسواء المخططات بس ربك يستر وما يكون الناس ضيعو قروشهم

عطاء تنفيذ بنية تحتية (طرق وكهرباء) بمنطقة المندرة لولاية النيل الأبيض - اغلاق 22/9/2014

Written By sudaconTube on الأحد، أغسطس 31، 2014 | 12:34 م

 


سودابد

يرغب السيد/ مدير إدارة التخطيط والتنمية بوزارة المالية والإقتصاد – ولاية النيل الأبيض في عروض طرق داخلية وشبكات كهرباء بمنطقة المندرة وفقاً لجداول الكميات والمواصفات والشروط المحددة بكراسة العطاء وعلى الراغبين الإلتزام بالآتي:-
1- إرفاق شهادة تسجيل واسم الشركة وإسم العمل.
2- وضع الدمغة القانونية.
3- صورة من شهادة التسجيل على القيمة المضافة.
4- إبراز شهادة خلو طرف من الضرائب سارية المفعول.
5- إبراز شهادة إبراء ذمة من ديوان الزكاة سارية المفعول.
6- إبراز شهادة تسجيل من المقاولين السودانيين.
7- إبراز شهادة تسجيل من مجلس تنظيم مقاولي الأعمال الهندسية.
8- السيرة الذاتية للشركة والأعمال المشابهة.
9- تقديم تأمين مبدئي لا يقل عن 2% من قيمة العطاء بشيك معتمد أو خطاب ضمان مصرفي ساري المفعول بإسم السيد/ مدير عام وزارة المالية والإقتصاد – ولاية النيل الأبيض يكمل إلى 10% لمن يرسو عليه العطاء ويرد لمن لا يرسو عليه.
10- تقدم العروض شاملة لكل الرسوم الضريبية والجمارك والقيمة المضافة وأي رسوم محلية آخرى.
11- تقدم العروض داخل مظروف مختوم بالشمع الأحمر بإسم السيد/ مدير عام وزارة المالية والإقتصاد – ولاية النيل الأبيض.
12- على الراغبين في الإشتراك بهذا العطاء إستلام الكراسة من مكتب إدارة التخطيط والتنمية بكوستي أثناء ساعات العمل الرسمية بعد دفع قيمة الكراسة البالغ قدرها 2.000 جنيه لا ترد.
13- آخر موعد لتسليم العروض يوم الإثنين الموافق 2014/9/22م الساعة 12 ظهراً وتودع بصندوق العطاء بإدارة التخطيط والتنمية بكوستي وهو الموعد المحدد لفرز العطاء.
14- السيد/ مدير عام وزارة المالية والإقتصاد غير مقيد بقبول أقل أو أي عرض آخر.

للإستفسار: 0124031222 – 0916232600 – 0912577252



مزيداً من الخداع ....
الاعلان عن المناقصة أعلاه ...
الهدف منه تسويق هذا المخطط  ....
شنو يعني إعلان بكم مليون ... ممكن يجيبوا قيمته من فرق سعر قطعة واحدة ؟؟؟؟ ..
المخطط دا في منطقة خلوية ....
تبعد حوالي 50-60  كيلو في الجنوب الغربي  لولاية الخرطوم ...
وأقصى الشمال الغربي لولاية النيل الأبيض ( حدودها مع ولاية الخرطوم) ....
بالمختصر المفيد دا شغل سماسرة ...
المخطط دا  واضح أنه صفقة لجهة ما عشان تغتني منه ....
خلاصة القول ... العنده قروش مامحتاجها لـ 50 سنة قدام ...
يرميها في جبل المندرة ....
أنا للآن غير مصدق قيام هذا المطار في تلك المنطقة  وهذا المطار سمعنا عنه قبل 6 سنوات  وعن الشركات الصينية والقطرية وغيرها وللآن لا يوجد على الطبيعة دليل على قيام هذا المطار حتى يتكلم الناس على الأحياء جوار المطار وخلافه ويعلم الججميع أن القروض التي كانت للمطار جرى تحويلها لأشياء أخرى قبل 5 سنوات وأين التمويل وأين الشركات والتي وقع معها العقد لازم من الذين يريدون الشراء في ما يعرف بالمندرة أن يتأكدوا  جيداً .
تعرف يا APO Md
حسب ما شوفته في مشيتي لي السودان دي انو مخطط ( المديده الحاره) قصدي الندره دهه
آخر كرت في ايد السماسر  نايمين عليه لي النزول
يا ديل لقيتم ليك حايمين بي لمن سفنجاتم اتقطعت و كرعينم حفت
و زووووووول كده بهببو ليهم الدور دهه من المغتربين مفي
والله حالتم الدور دهه يرثي لها  ابدا ما عجبتني blush
ودو الاسعار السما لمن فرملو السوق كولو
واسهه بقو كايسن لي البنزله ليهم تاني
اصحاب العقارات قالو ليهم وين كان ليكم
عشان كدهه مديدة المندره دي بقت بس ياهه قبلتم الوحيده
ذمان كان تجري وراهم جري الوحوش ما تحوشم
اسه والله انا  بقيت ادخل بيتنا و اطلع منو بالدس ذي الحرامي منهم
اصلح الله حال البلاد و العباد
الحبيب ديك لاهاي  ...
حمداً لله بالسلامة ...
مخطط المندرة أكذوبة وشغل سماسرة وربطه بالمطار الجديد ...
بيع وهم للمساكين ....
( البيع في الخرطوم والتسجيل في القطينة ؟؟؟؟؟؟؟؟؟؟ !!!!!!!!!!!!!!! )
وياريت أي واحد مايشوف بعينه مايشتري ....
12


عفواً.. لا يمكنك المشاركة، يمكنك التسجيل في حال رغبتك بذلك.


جديد المنتدى

كلمات البحث

تابعنا

تابع اجدد الإعلانات