Support
منتدى فتش منتدى السودان البحث عن مقاول صادق و امين
1

البحث عن مقاول صادق و امين

نبحث عن مقاول صادق و امين و لديه ذمة لاكمال بناء بيت في السودان
الافضل تكون انت جربته

الحاجة الثانية ،نبحث علي شركة تركية او اجانب المهم ما سودانين كاختيار اخر


السودان انا اقتنعت انه عمره ما حيمشي لقدام اذا لم يتغير الانسان السوداني الذي يعيش في ارض الوطن لانع اصبح انسان مستهتر و فاسد
التعليقات
والله صدقتي قمت الاستهتار والسرقه الا من رحم ربي المشكله حتي الاجنبي في السودان خرب طبعه
سلام يا  ام احمد ويا عبد الرحيم عندي سوال عن كيف افتح بوست جديد وشكراfrown
الزول السودانى اصبح مسخ انسان للاسف الشديد 
كون انك تلقي مقاول نزيه دي شيليها من راسك خالص.  احنا القروش اللي نهبوها مننا المقاولين في طابق واحد لسسسسسع ما انتهى المفترض تشتري لي قصر تلاته طوابق تشطيب سوبر ديلوكس في امريكا. بس الحممممد لله

الله يكون في العون
صباح الخير عليكم
انا بعتبر دا اهمال منك يا أم أحمد ، عموما ربنا يعوضك ان شاء الله
اي مقاول عايزاهو يشتغل ليك تتفقي معاهو على اجرة الاعمال فقط ، يعني تجيبي المواد من عندك وهو ينفذ وكل شئ بسعرو ، وتديهو على قدر البشتغلو ( ما تديهو مقدم كتير ) ، وطبعا لا بد من انك تجيبي استشاري من طرفك لمتابعة الشغل ويشوف هل شغل المقاول مطابق للمواصفات ام لا ، بالاضافة لي انك تجيبي حارس من طرفك يحرس ليك مواد البناء ما تتسرق  ، وبكدا تكوني أمنتي كل شئ ومافي مجال للسرقة
عموما انا عندي مقاول بس ما بعرف اذا هو فاضي  يمسك ليك ولا لا  ، وهو شخص أمين جدا ، ح اتصل عليهو وبديك خبر ان شاء الله على الخاص
في واحد تاني انا ما جربتو شخصيا لكن نفذ 4 او 5 فلل  على مستوى عالي لى  ناس اقربائي وبقولوا انو شغلو ممتاز وانسان صادق
عموما اكل القروش من المقاولين أخف قدرا من عيوب في تصميم البيوت او اخطاء هندسية تؤدي الى ما لا يحمد عقباه ، ركزي في جودة العمل اولا وبعد كدا السعر
تحياتي

ابو العيال في بداية الصفحة في  ( اضافة موضوع جديد)  و تكون فاتح ((منتدي السودان))   وليس المشاركات
الاخ عمر جده سلامات يا اخي الواحد المقاول لو بقي ماعنده زمة مهما عملت بتعبك
ده مقال منقول

في إحدى مواقع العمل إكتشفت أن عامل المحارة (المُبيض) قام ببياض السقف بطريقة عشوائية لدرجة أنه بيض الإسمنت وأغلق علب الكهرباء التي تخص تركيب لمبات السقف .. ، وكانت المشكلة أنه لا توجد خرطة توضح بالضبط أمكنة العلب ، فأستعنت بكهربائي سوداني بصورة مؤقتة لان الكهربائي الأساسي الذي يعمل عندي مشغول بموقع أخر ولن يحضر إلا بعد عدة أيام ، غفلت عن الكهربائي السوداني بعد أن أوضحت له المشكلة وطلبت منه البحث عن العلب المفقودة تحت الإسمنت ، غبت عنه لمدة خمسة ساعات ولما عدت فوجئت لما فعله ..!!

صاحبنا الكهربائي رغم أنه كبير في السن وصاحب خبرة كما يقول وجدته يحمل في يده شاكوشا وأجنة ..! وقد قام بتكسير بياض نصف سقف الغرفة ولا زال مواصلا في الكسر ورغم ذلك لم يجد العلب المخفية ..!! أصابني الغضب لفعلته وهجت ومجت فيه وهو مصر ان ذلك هو التصرف الوحيد الذي أمامه كي يجد العلب ، وصار يتفلسف لي بخبرته الطويلة وما أدراك ما الاعمال التي قام بها وأنا في شدة الغضب فإتصلت بالمصري وطلبت منه ترك ما في يده والحضور فورا وقد كان ..!!

المصري لدي دخوله للغرفة أصابه الذعر من منظرها المشوه وإستهجن أن يقوم السوداني بهذا التخريب ، فإستشاط السوداني غضبا وذكر أنها الطريقة الوحيدة ولا يوجد غيرها وبالغ في الرغي والفلسفة وسوق المبررات ..! المصري وبكل هدوء أحضر سلما وصعد للسقف على أقرب علبة مفتوحة في الهول المجاور واوصل خرطوشا للماء في إحدى المواسير وضخ المياه بإتجاه العلب المفقودة .. وبعد إنتظار حوالي خمسة دقائق ظهر بلل في السقف في بقع بعينها فاوقفنا ضخ المياه وصعد المصري للسقف وبواسطة شاكوش صغير وبكل سهولة ضرب على مناطق البلل فتكسرت وظهر تحتها العلب المفقودة جميعها..! والمشكلة ان التكسير الأول الذي قام به الكهربائي السوداني كان بعيدا تمام عن مناطق العلب التي وجدها المصري بمعنى أنه لو واصل في تكسير السقف لهده فوق رؤوسنا دون ادنى شك ..!!،

!! كل ذلك والسوداني يتفلسف ويبرر فعلته وخيبته ،، وقد تسبب ذلك في منصرفات مادية إضافية لصيانة وبياض ما كسره ..!!

العامل الحرفي السوداني وبسبب غروره و(فلقصته) لا يريد حتى التدريب وإن توفر له بمقابل ، كما أن الحكومة لا دخل لها في تدريب العامل الحرفي لان الحرفيين في الأصل يفترض فيهم المهارة في إداء العمل الذي إمتهنوه ، ربما دور الحكومة يتوقف في مدارس التدريب المهني أو عبر نقابات الحرفيين لتوفير التدريب أو المدارس الصناعية عموما ولكن بعد ذلك يفترض على الحرفي أن يطور نفسه بنفسه مع مرور الزمن حتى يستطع المواكبة ..

دعني أضرب لك مثالا عن غرور العامل السوداني وعدم إستعداده للتدريب ..:

قبل فترة قصيرة بدأت إحدى شركات البوهيات نشاطها بالسودان وإفتتحت مصنعا لذلك ، وقد قدر المسئولين في المصنع أن مزايا منتوجاتهم ينبغي ان يفهمها النقاشين اولا قبل الزبائن لانهم هم من سيدركوا جودة المنتج وخصائصه (وهذه نظرية صحيحة تماما) فقر رأيهم على دعوة جميع المشتغلين في مجال النقاشة ودهن وخلط الالوان لدورة تدريبية مدتها عشرة ساعات فقط من الصبح وحتى المساء تحتوى على محاضرات في خصائص المنتج ومزاياه وما يوفره من جماليات وأيضا محاضرة في كيفية الإستخدام السليم لفرشاة البوهية و(الرولة) وكيفية خلط الالوان بصورة صحيحة كي تقلل من فاقد البوهية وتقلل من نسبة الخطأ في تركيب الالوان ، مع كيفية إختيار الفرشاة السليمة ذات المواصفات المعينة من بين عشرات الانواع من الفرش الموجودة بالسوق ، وقد وفرت الشركة حوافز مغرية للنقاشين حيث جاءت بعدد 2 بص للترحيل لأماكن تجمعاتهم بسوق السجانة (أكبر سوق مواد بناء بالعاصمة) وعرضت وجبتين وأيضا مبلغ نقدي مجز لكل مشارك في الدورة كتعويض عن يوم العمل الضائع بالإضافة لهدايا من الشركة كأمثلة لنوعية الأدوات التي يفترض العمل بها ..!

فانظر كيف كان ردة فعل معظم من تمت دعوتهم ...!:

الكثيرين إستهجنوا أن يكونوا (تلاميذ)! للشركة الجديدة التي أرادت تعليمهم فنون الدهن السليم ولسان حالهم يقول (هسي ديل دايرين يعلمونا النقاشة ؟؟!) ، (دايرين يورونا إنو نحن ما بنعرف حاجة ولا قصدهم شنو يعني ؟!) والكثير من العبارات من هذه الشاكلة سمعتها باذني هاتين من العديد من المشتغلين بهذا المجال ولم أسمع أي أحد من هؤلاء يمتدح الفكرة أو حتى يفكر مجرد تفكير إيجابي بفوائد هذه الفرصة في ترقية نفسه ومواكبة ما أستحدثته التقنية الجديدة في مجال الدهانات ، ولو كانوا ذهبوا لهذه الدورة والمحاضرات المجانية لما إضطر والدي لان يقول ما قاله لاحد النقاشين حين حضوره لشراء بوهيات مع أحد الزبائن ..!

وقصة والدي والذي عمل في صناعة وتركيب البوهيات والدهانات منذ أن كان صغيرا ويعمل مع والده (جدي) منذ أن بدأت صناعة البوهيات في السودان ، تتلخص في أنه كان موجودا في مكتبه ذات يوم وحضر إليه أحد الزبائن وبرفقته نقاش قديم في المهنة من النوع الذي يقولون عنه في فرنسا (لم ينس شيئا ولم يتعلم شيئا) ، وكان الزبون يطلب المشورة في طريقة دهن وتركيب إحدى المنتجات وأثناء شرح والدي للزبون وللنقاش عما يجب فعله كان النقاش كثير المقاطعة والغُلاط لوالدي !! وتجادل معه في أمور بديهية في النقاشة ، حتى نفذ صبر والدي حين قال له الصنايعي أنه نقاش لمدة عشرون عاما وأنه لم يقتنع لما قاله له الوالد ، فما كان من الوالد إلا وأن قال له : (والله إنت نقاش ما ناقش حاجة ولا داير حتى تصبر عشان تنقش حاجة) ..!!


نعم يا محمد موسى أسواء ما في الحرفي السوداني هو عدم إلتزامه بتقدير تكلفته وزمنه المحدد لإنجاز العمل وكل ذلك بسبب تهرباته الكثيرة عن العمل تحت معاذير مختلفة يتضح في نهاية المطاف أن أكثر من 90 في المائة من أعذاره محض كذب لتبرير كسله ليس إلا ..!!

أعطيك مثالا عن الحرفي الذي يعمل في مجال البناء ، جميعهم إلا من رحم ربي أعذارهم متشابهة عند التهرب من العمل إلى حد كبير وسأضرب مثالاً بأصحاب (الطشمة) منهم وسيجد كل من يمارس العمل في مجال البناء والمقاولات أن ما سأسرده هنا يحدث بالكربون لديه مع إختلافات طفيفة ..

تكلف أحدهم بعمل (سباكة ، نقاشة ، بناء ، محارة ....إلخ ) ، يوم السبت يأتيك مبكرا وبكل همة ونشاط يبدأ العمل حتى نهاية اليوم ، يوم الاحد يأتي متأخرا قليلا فتسأله فيجيبك أن جارتهم توفى نسيبها وأنهم ذهبوا للمقابر لمواراة الجثمان ، يوم الاثنين لا يحضر مطلقاً ، تتصل عليه فتجده قد أغلق موبايله !! .. يحضر يوم الثلاثاء بعد منتصف النهار .. تستفسره فيجيبك أن إبنه لديه مشكلة في المدرسة وأنهم طلبوا حضور ولي أمره وذلك سبب التأخير ، يوم الاربعاء يعمل بهمة ونشاط منذ الصبح ولكنه ينصرف قبل الثانية ظهراً تسأله فياتيك الرد أنه يريد الذهاب للميناء البري لإستقبال عمة زوجته القادمة من البلد ..! يوم الخميس يأتي مبكرا جدا ويعمل بهمة ونشاط طوال اليوم (طبعا عشان دا يوم المصاريف) !! تعضيه بعضا من أجره وأنت متحسر ومضطر وإذا رفضت يقول لك أنه عمل بجد طوال الإيسبوع رغم ظروف الوفاة ومشكلة إبنه وإستقبال عمة زوجته ويوعدك بانه يوم السبت إنشاء الله سيعوض ما فقده من زمن ..!!

أما الاسبوع الثاني فحدث ولا حرج .. تكاد تفضل عليه الإسبوع الأول ..!!

صاحبنا يوم الخميس يخرج من عندك وجيبه ملئ بالنقود ،، في طريقه لمنزله يعرج على صاحب مطعم في الناصية ويشتري 3 طلبات (شية وأم جقاجق وقوانص جداد) ..!! يحملها وقبل الوصول لمنزله يعرج على دينارية ست العرقي ..!! ويشتري منها قزازتين سيوبر ومنها على البيت ..! يسكر ويتطين وياكل ويمزمز ويستفرغ الليل كلو ..! يوم الجمعة ما يقوم من نومو إلا الساعة تلاتة ضهر ..! يطلع من البيت يمشي الميدان يحضر التمرين ويرجع المغرب يواصل في سكرتو وحيرتو ،، يقوم السبت الساعة إتناشر ضهر يكسل يجيك الشغل ويقفل منك موبايلو ..!!

يوم السبت بالليل ما بيسكر ولا بيتطين ، لكن بيمشي لي أقرب سوق عشوائي يشتري ليهو قميص بي سبعة جنيه ..! يوم الأحد بيجي الشغل الساعة عشرة ويقعد يتلفت ويتمحرك بي قميصو العاجبو ولا يشتغل ،، تسألو مالك ؟! يقول ليك انا جيت إشتغل لكن شاعر بي حمى وداير أرجع لكن بجي بكرة أواصل (التقول هو بدا حاجة عشان يواصلا ؟! ) ،،.. يوم الإتنين بيضرب ليك تلفون بعد الساعة إتناشر يعتذر إنو ما جايي عشان مرتو بتلد في المستشفى (طبعا الاتصال دا عشان يخدرك وما تجيب زول غيرو للشغل) .. يوم التلاتاء بيجي للشغل ويشتغل زي الحمار ..! (ما حبا في الشغل لكن عشان القروش العندو خلصت وما في سبب يخليهو يقعد في البيت) ..! يوم الاربعاء بيجي يشتغل نص يوم وبيرجع بدون ما إنت تلاحظ إنو طلع (نظام زغبير وكدة) ..! يوم الخميس يجيك بدري زي التقول مصحيهو ديك الفجر ..! ويبدأ يشتغل بي كل إجتهاد ومسئولية وفي نهاية اليوم يشيل منك مصاريف الإسبوع ..!!

يخرج من عندك وجيبه ملئ بالنقود في طريقه لمنزله يعرج على صاحب مطعم في الناصية ويشتري 3 طلب شية وأم جقاجق وقوانص جداد ..!! يحملها وقبل الوصول لمنزله يعرج على دينارية ست العرقي ..!! ويشتري منها قزازتين سيوبر ..... إلخ ...!!

دا نهج تسلسل أيام الاسبوع عند الصنايعية ديل ..!!!

وإنت بي كل حسرة حا تلقى إنو الشغل المفترض ياخد إسبوعين أخد بقدرة قادر شهرين ..!!

وفي مداخلة لي قدام حا أوريكم كيف العامل المصري بيفكر وكيف بيقسم أيام الأسبوع على الشغل عشان تشوفوا الفرق ..!

العامل السوداني الكسلان دا لو طلع برة السودان شبر واحد والله يشتغل احسن من الحصان ..! لييه ؟! لانو هناك ما في لعب ولا في مراعاة لي أي ظروف .. والزول المشغلك دا لا بيعرف حبوبتي إتوفت لا بيعرف مرة سيد الطابونة عندها سماية ..! تشتغل تاخد أجرك كامل ما تشتغل بيرجعك السودان كارقو في أقرب باخرة ..! عشان كدة الحرفيين البيشتغلوا برة السودان وبالذات في دول الخليج بيشتغلوا بي جد وكد وإجتهاد لانو عواقب تراخيهم هناك وخيمة وبعد دا فاضحيننا وشارطين عينا عند العرب وجايبين لينا السمعة البطالة ومضرب مثل في الكسل ..!

أها لما يرجع السودان ويقول ليك إنو كان شغال في الخليج .! والله يقولا ليك بي طريقة زي الكأنو كان شغال هناك طبيب مخ وأعصاب .. فلقصة وقرضمة ما تديك الدرب .. والمصيبة إنو الشريحة دي بالذات دايرين ينتقموا للعصرة الإتعصروها هناك مع كفيلم فينا انحنا هنا .. لو كفيلم كان مشغلم 15 ساعة في اليوم والله هنا ما يشتغلوا ليك خمسة ساعات ..!!

طبعا في إستثناءات لكن دي الحالة العامة ..!!!

مثال :

قبل فترة كنت شغال في موقع خارج العاصمة شوية على الطريق السريع بين الخرطوم ومدني .. فجأة حصلت إشكالية في الكهرباء وانا الكهربجية البتعامل معاهم كلهم بعيدين وكنت محتاج لي كهربجي ضروري ..! مشيت لي أقرب مغلق وسألت من كهربجي وبتاع المغلق قال لي حا أضرب ليهو تلفون أخليهو يجيك في الموقع ..!!

بعد حوالي نص ساعة جاني واحد في الموقع يمين انا لمن شفتو قايلو واحد من رواد الفضاء بتاعين ناسا ..!! الزول جاني لابس أبرول أصفر وبوت طويل بي رقبة برضو أصفر ونضارة عريضة صفراء وخاتي في راسو طاقية صفراء برضو من النوع بتاع الحماية داك .. يا خي أنا لمن شفتو قربت أقول ليهو وين قزازة الميرندا عشان يتم الناقصة..!! أنا لمن قال لي إنو هو الكهربجي طوالي دخلت في الموضوع ووريتو يعمل شنو ؟؟! صاحبنا إستاء شوية لمن لقى الشغلة بسيطة والظاهر هو كان مفتكر الشغلة كبيرة بتاعت كم شهر أو كم يوم ..! شبكني ليك زمن ونقة من نوع : أنا كهربائي محترف وكنت شغال في العراق مع الحجاج بن يوسف ..! وكنت شغال كهربجي في ديوان كسرى ..! وإشتغلت بطيخطاشر سنة في الحدود مع إيران ..!! يا خي والله نقة وصرف عربي مبالغ فيهو ..!!

إستمعت ليهو بي صبر .. بعد ما إنتهى قلت ليهو . نرجع لي موضوعنا .. كدي ملص الهدوم الواقية من الرصاص دي وإشتغل القلت ليك عليهو ..! زولك ما قلع هدومو لكن بدا يشتغل وانا إنشغلت بي حاجة تانية بعد شوية أسمع حاجة قالت (تللللللللل) !! جيت جاري لقيت زولنا الكهرباء طقتو وقاعد يفرفر زي البيخرج في الروح لميت العمال شبكوهو ليك خبيت بالخشب لامن روحو قربت تطلع .. قام يا الله الله وهو بيطنطن ومخلوع ما فاهمو بيقول شنو ..!! قلت ليهو يا زول إنت كويس إنشالله ما جاتك عوجة ؟!! قال لي لا لا ما جاتني حاجة .. قلت ليهو الحصل شنو ؟! قال لي لا لا ما في حاجة بس كهربة السودان مختلفة شوية من كهربة العراق ؟! وقبل ما يتفلسف قلت ليهو .. طبعا طبعا .. كهربتنا هنا ما بترحم الزول البيتفلهم وبيشتغل شغلة ما شغلتو ، خلاص با عمنا عفيتك أمشي أرتاح في بيتكم ..!!

متى بدأ غزو العمالة المصرية للسودان ؟؟!!

بدأ غزو العمالة المصرية التي تعمل في مجال البناء البلاد تقريبا في منتصف العام 2005 ، حيث شهد هذا العام تحديدا وفود عشرات المئات من الأشقاء المصريين (ولا زالوا يتوافدون بكثرة ملحوظة) عبر منفذي وادي حلفا ومطار الخرطوم بكثافة منقطعة النظير ، وربما يُعذى هذا التدفق للركود الإقتصادي في مجال الإنشاءات الذي ضرب جمهورية مصر وإنتعاشها في السودان بالمقابل بفعل ثبات صرف العملة في مواجهة الدولار واليورو ، بجانب الحركة العمرانية الواسعة التي تشهدها الخرطوم ومعظم ولايات السودان .

قبل ذلك التاريخ كانت العمالة المصرية محدودة جدا في السودان وكانت في الغالب تأتي عبر شركات إنشاءات ومقاولات مصرية أو سودانية لإنجاز مهام بعينها ومن ثم العودة غافلة أدراجها أما الان فإن هذه العمالة أستفادت من إتفاقية الحريات الاربع الموقعة بين مصر والسودان (والمًطبقة من جانب واحد!!) للحضور والاستقرار بالسودان للبحث عن فرص العمل والتي صار من السهل إيجادها بسبب تبرم اصحاب العمل من كسل العامل السوداني وقلة إنتاجه وإنعدام مؤهلاته في أبسط أبجديات العمل ..،!!

العمالة المصرية التي جاءت إلى السودان(أغلبها من منطقة المنصورة) كانت من الذكاء بمكان بحيث قرأت من الوهلة الاولى متطلبات السوق السوداني ودرست الثغرات والعيوب الكثيرة التي يتميز بها العامل السوداني وعملت على التسرب من خلال تلك الثقوب للإحلال مكان المهني السوداني والذي كان قد صنع مناخا عدائيا حوله من قبل أصحاب العمل وبالتالي فقد كانت الساحة مهيئة تماما لإستقبال العامل المصري ..

والعمالة المصرية ذكية جدا ، فقد سعت منذ البداية لتكون في أيادي من يطلبها بسهولة ويسر .. فقد سكن المصريون في مجموعات بإستئجار منازل لهم في الأحياء الشعبية وأحيانا الأحياء الفاخرة كي يصنعوا لأنفسهم الدعاية المطلوبة ، وأفراد السكن هؤلاء لا يسكنون عشوائياً بل يسكنون في شكل مجموعة متكاملة تجد في السكن الواحد النقاش مع السباك مع النجار المسلح مع عامل البياض مع عامل السيراميك !! وذلك كي يسهل لهم العمل كمجموعة متماسكة .. وقد سهل ذلك لهم مشكلة السكن الغالي نوعا ما فأحيانا في حالة المشاريع الكبيرة يفضل صاحب المشروع بأن يأخذ معه كل المجموعة للعمل والإقامة في الموقع ليعملوا كمجموعة تكاملية ، وفي ذلك خير له ولهم إذ هو سيضمن أن هؤلاء العمال بجواره عند الطلب والمجموعة تضمن لنفسها عملاً متواصلا بالإضافة لسكن مجاني وايضا توفير للأموال التي تصرف في المواصلات في حال كان الموقع بعيدا عن منطقة سكنهم
الكريمة ام احمد 
تحية واحترام 
انا ما عارف بالضبط كيف عرفتي المقاولين حرامية واكلوك لو كانت التكلفة العالية فقط 
يكون جانبك الصواب تماما 
في السودان اذا كان الطابق ارضي وفيه شقتين بمساحة 240 متر وكلفك التالي 
1 / القواعد والعمدان القصيرة والفرشة الارضية والعمدان الطويلة وسقف الارضي = 380 مليون
2 / تقفيل بالطوب الاحمر                                                                            =40 مليون
3 / التشطيب                                                                                             190 مليون
اجمالي                                                                                                    610 مليون
او طابق ثاني نفس التكلفة فقط البند رقم واحد يصير  140 مليون والاجمالي 470 مليون
يعني اجمالي تكلفتك في الطابق الارضي 610 مليون وبالمتكرر 470 مليون تبقى ما مقشوشة وسعرك مظبوط
ما قصدي ادافع عن المقاولين بقصد اوريك التكلفة الحقيقية بالنسبة للسودان
اما ذمة المقاولين والله كوتش على قول المصريين الا من رحم الله ويسرقو الكحل من العين بس
الخير باسط وموجود
.....................
ياريت ام احمد للفائدة العامة تدينا تكلفة الدور الى الان والمتبقى فيه 
الاسعار دي اداني ليها واحد وانا ما مقتنع بيها 
بيقول الشقة بتتشطب ب 90 الف ريال يعني 180 مليون تشطيب فقط لشقة مقفلة بالطوب 
............................
تحياتي 
الاخت العزيزة ام احمد .. لو كنت طرحت هذا السؤال قبل شهر واحد فقط لكنت اوصيتك بمقاول امين نظيف السمعة .. الا انني و بعد ان ذهبت بنفسي و اشرفت ع موقع البناء وجدت ان لا وجود لمعنى المقاول الامين .. فقد تجدي المقاول ذو المصنعية الجيدة و المواد الرديئة .. او ذو السعر الرخيص و الاداء و الاشراف الضعيف .. اما عن تجربتي فاكتشفت بعد ذهابي الى عطله و اشرافي ع الموقع ان المقاول لم يلتزم تماما بتفاصيل و مواصفات الخرطة من حيث الكميات و المواد .. بالتالي فنصيحتي لوجه الله تعالى ولكل من يريد ان يبن# هي نفس نصيحة الاخ عمر جدة .. فهو قد اصاب تمام .. اشتري المواد بنفسك .. و حاسبي المقاول بقدر ما انجز فقط .. لا تعطيه الكثير فلا تجديه .. و اجعلي مهندسا متخصصا من طرفك يستلم المراحل و المواد اولا باول .. حتى ولو اعطيته راتبا شهريا بانتظام ...
     الاخ العزيز  رحمي  ,                                                                                                                                                                            تعرف المعضله الحقيقية وين ؟ عندنا في السودان الفاشلين اكاديمياً و لا يملكو مهارات يدوية ديل بالذات يتوجهو  إما لي البوليس (و المؤلم  الضحك إنو بعضهم يقول لييك انا اشتغل بوليس ) او  يوجهوهم  لي مهن المهارات الحرفيه و كأنة الفشل الذي لآحقهم قد شفع لهم من تلقي ابسط تدريبات السلآمه الحرفيه والمترتب علي الحصل دة ما دير ليه شرح ولآ تخيْل بل هو واقع حاضر و مٌعاش. 
السلام والتحايا لجميع المتداخلين ..
الشكر كل الشكر للأخوين عمر جدة ورحيم .. أخونا عمر جدة وينك يا راجل مسجل غياب ، شكلك كدا إنشغلت مع الاستقرار وما أدراك ما الاستقرار .. حقيقي الواحد فقد أفكارك الجميلة والمفيدة .. ربنا يوفقك إنشاء الله..
الاعزاء عمر جدة و الحوتي سلامات,                                                                                                                                                                                                                                                                         هاكوم دي  قبل فترة  إشتريت بيت شعبي  عادي قديم في الصحافة خيرتو بس بير سايفون جديدة كرت                                                                                                                                                                                                         لبيت خليتو فاضي عشان ما اخوش في تلتلة مع مؤجرين قلته لحدي ما القه الصادق الامين                                                                                                جاري اليمين قام جاب ليه مقاول و قال لي إتفقته معاهو علي ارضي + اول بي قواعد لي 4 ادوار في 3 شهور بس تسليم مفتاح  الكلام ده كان شهر 7 سنة  2012                                                                                                                                                                                                    اهة انا قولته  يا ولد كدي (نشوف مويتو) و دي ركزو لي علييها زي ما بقول حبيبنا الحوتي                                                                                            المهم  كلفتة اخوي اتابع الناس ديل شغولهم كيف وطبعا جيراني سلمو بيتم لي الراجل و رحلو بي وشهم  اهة بعد فترة سألت اخوي الجماعة وصلو وين ؟                        اول حاجة قال  لي القواعد كان بكوبو الخرصانة والرمله و الاسمنت في ( اٌم الحفر) يلحقوها طولب (محطة 7 مكان لي تجمع العمال و المهرة في الصحافه) بي خرطوش المويه  و الكواريك  قبلهة  و لمن وصلو مرحلة الاعمدة زنك عرش البيت القديم داك زاتو  دقو إستعدلو عملو فرمات لي صب الاعمدة  و جماعتك اصحاب البيت  نايمين في العسل (ما طبعا نظام  تسليم مفتاح و كدة )                                                                                                                                                                                                   لمن الموضوع فات ال 11 شهر وازيد  و قروش الاجارات كترت عليهم جو يادوب فقدو زولم  و الجغلبه حصلت و مشاكلم قايمة و قاعدة  و اعمدة اتكسرت  من جديد و اتصبت و ... و...  جماعتك لي يوم اليلة في امشي و تعال و ما سكنو                                                                                                                                المهم آخرته الاسبوع الفات ضرب لي اخوي تلفون                                                                                                                                             شنو يا زول ؟                                                                                                                                                                                         قال لي والله مشيت شوفته البيت لقيتو غرقان ( مويه) و الحيط  العلي جاري اليمين ذاته شربا نة فول و الغريبه ماسورتنا الرئيسيه مغفوله من الشارع بي ضبه                     اهه يا اخوي المويه  دي من وين كدي افتح البير دي شوفه                                                                                                                                   قال لي موية البير لقيته تحت غطا البير طوالي                                                                                                                                                  اهه بعد البحث و التحري اتضح إنو التوصيلات الجديدة بتاعت عمارة جيراني قبل اسياده ما يسكنوها  نصها ماشي بي تحت الواطه و كلها ضاربه سقت القواعد تحت و إتسربت لحدي بيتي هنا                                                                                                                                                                                                      اهه زي ما قلته  ليكوم المقاول وراني مويته  بيان بي العمل
الاخوه الاعزا  عزراً لردائة ترتيب النص حقيقه لديّ مشكله كبيره في إستخدام الكيبورد هولندي/ عربي
السلام عليكم يا اخوان واخوات بادئ ذي بدء مانعمم دايما @ فشايفكم طلعتو المقاولين حراميه ومانافعين@ وده ماصحيح في اي مهنه في الكويس والكعب@لكن ياجماعه لما يكون عندك ارض عاوذ تبنيها تشوف عروض كم مقاول ويديك نبذه عن الاعمال القدمه وتمشي تشوف عمل نفذو واهم شئ اذا بقيت عليهو تمضو عقد بشروط وتجيب استشاري لكن انت مابتقومو بالصاح وبعدين تقع الطامه@ ربنا يعينكم ويعينا. الامضاء مقاول مباني
للفائده:- ارض مساحتها الكليه 400متر مربع والمساحه المبنيه 300متر مربع اولا": تجهيز التصميم والخرطه التي تراها مناسبه بالتشاور مع المصمم. علي ضؤ الخرطه بتتحدد تكلفه البناء. في حاله بناء اعمده اول خطوه حفر القواعد والاعمده القصيره. التكلفه للقواعد تختلف اذا الارضي فلات اسلاب او بيم ارضي. بعد مرحله القواعد تأتي مرحله اعمده الارضي يليها السقف وقلبه السلام. ثم يأتي التقفيل بالطوب والتشطيب وتكلفه التشطيب تختلف حسب نوع التشطيب اذا عادي او ديلوكس او سيوبر ديلوكس. مساحه 300متر مثلا شقتين تكلف قواعد واعمده قصيره واعمده ارضي والارضي بيم وسقف الاول تكلف 450مليون مواد ومصنعيه واذا الارضي فلات اسلاب تكلف 650مليون. اما التقفيل والتشطيب مواد ومصنعيه يكلف 200مليون للشقتين. اذا الجمله في حاله بيم ارضي 650مليون. وفي حاله فلات اسلاب تكلف 850مليون.
السادة/ الصديق اخوان 
      السلام عليكم
ممكن بالتقريب تكلفة هيكل للدور الارضي لبناء مؤسس لعدد  4 ادوار عدد الاعمدة 23 عمود وطريقة البناء سقف معلق فلات اسلاب وفقا لاسعار اليوم للمواد والمصنعيه علما بان المساحة المبنية 225  متر

السادة / الصديق اخوان
السلام عليكم 
اما التقفيل والتشطيب مواد ومصنعيه يكلف 200مليون للشقتين
ممكن تفاصيل أكثر عن التقفيل التشطيب 
- نوع الطوب المستعمل
- الأبواب 
- الشبابيك
- السيراميك
- أخرى 

    تحياتي


الاستاذ عبد الرحيم : مجرد انك انت فكرت تبني التعب حاصل حاصل ، والتعب ذاتو درجات ، في تعب بنتهي مع انتهاء الشغل ( ودا تعبك مع المقاول الجيد ) وفي تعب بستمر بعد انتهاء الشغل ( وطبعا دا تعب المقاول الردئ )
لكن التعب حاصل حاصل
ومن المهم انك تتعب عشان شغلك يطلع مظبوط  لأنو دا حصاد سنين
اخونا ود البلد : انا قاعد لكن الدخول للمنتدى ما كل يوم ، الجري كتير في السودان
اخونا صديق ( المقاول ) اكيد في مقاولين ممتازين لكن في مقاولين خربوا سمعة المقاولين الممتازين واصبح الانطباع السائد انو المقاول حرامي وسئ حتى لو كان أمين وجيد في عمله
اخونا ديك لاهاي : الله يكون في عونك ، لكن تقدر تبيع بيتك دا وتشتري في مناطق أرقى وأرخص
تحياتي لكم جميعا
الاخوة الكرام
اعتزاري مره اٌخري لمشكلة  التكرار و الكيبورد و اتمني او اقترح علي إدارة المنتدي من  إضافة آلية او إمكانية لتصحيح  تعديل او حتي حزف المشاركات الغير صحيحه او مرغوب فيها لي اعضاء المنتدي بانفسهم .

الجميل عمر جدة@

اولا الشكر الجزيل لمساهماتك الفيده و البنائه
يا ريت و تدينا ارائك لما تراه الان في الخرطوم من  مناطق ارقي وارخص و هنا اقصد المقارنه بالصحافات التي هي من حيث حداثة  التخطيط لا تضاهيها اى منطقة في الخرطوم و كذلك موقعها الوسطي والتجاري  كمستقبل

و للحقيقه بعض الزملاء المهندسين من هولندا عندما اطلعتهم علي خٌرط كيفية تخطيط منطقة الصحافات في زاك المكان من افريقيا و ذالك الزمان و بايدي سودانيه اصابهم ذهول لقولهم ان هذا تخطيط لمدينه حديثه رٌعي فيها كل متطلبات المدن الكبري الحديثه من نموء و تطور و كذلك مواكبة اي تحديث او تجديد.

و برضو يا اخ عمر بعد فترة استقرارك القصيرة والتي نتمني ان تكون فعلا استقرار و راحة من عزاب الغربة يا ريت و تدينا إنطباعك عن الوضع هناك كراجع مستقر نهائي

خالص شكرى

الاخ / ديك لاهاي

مساء الخير

الوضع في السودان ممتاز لي زول عندو رأس مال و شغال في التجارة ، اما الوظائف ما منها فائدة  نهائي
حتى في التجارة لازم تكون حريص جدا لعدم استقرار سعر الصرف ، لأنو رأس مالك ممكن يتآكل
بالنسبة للاماكن الارقى من الصحافات فيها كتيرة في العاصمة ، لكن انا صراحة ما عارف اسعار الصحافات كم لأنو تقريبا منطقة  الصحافات ما فيها بيع وشراء الا نادر جدا
لكن لو عرفت قيمة البيت حقك كم ممكن ادلك على اى من الاماكن الراقية يناسبك
لو بديت بالخرطوم مثلا
قاردن سيتي سعر المتر حوالي 7 مليون
الرياض 6 مليون
المنشية 5 مليون
الطائف حوالي 4.5 مليون
المعمورة من 2.7 مليون
ام درمان
الروضة سعر المتر 4 مليون
المهندسين تقريبا 3 مليون
الواحة سعر المتر 2 مليون
بحري
الصافية من 3.5 مليون
شمبات البراحة من 2.5 مليون
كافوري من 1.8 الى 6 مليون
درة الحلفايا سعر المتر حوالي 1.7 مليون

دي اسعار تقريبية

تحياتي


حتى انقل التجربة .. اتمنى الا يبدأ اي شخص بالبناء مالم يكن متابعا لصيقا لاعمال البناء و المراحل ..
سلامات :
الاخوة المغتربين ربنا يكون في عونكم والله الواحد بيموت من البيحصل ليكم دا

دا تلفون مقاول امين وشاااااااااااطر وبيشتغل بالمراحل يعن حفر - قةاعد - بيم اوبيدروم - اعمدة - سقفة - الخ،،، بنصح بيهو الجميع
الحاج : ت 0916511554
1


عفواً.. لا يمكنك المشاركة، يمكنك التسجيل في حال رغبتك بذلك.


جديد المنتدى

كلمات البحث

تابعنا

تابع اجدد الإعلانات